Euskadin, helduen %46,4ak gehiegizko pisua du, eta talde horren barruan, %16ak obesitatea du.

Urte berriaren etorrerarekin, askok helburu berriak ezartzen dituzte, eta ohikoenetako bat pisua galtzea da. Hala ere, prozesu horrek zalantza asko sor ditzake. Horiek argitzeko, Alfredo Yoldi, Policlínica Gipuzkoako endokrinologoak, hormonen zeregina, bizimodu osasungarriaren garrantzia eta helburuak modu eraginkorrean eta iraunkorrean lortu nahi dituztenentzat eskuragarri dauden aukera medikoak azaltzen ditu.

Euskadin, helduen %46,4ak gehiegizko pisua du, eta talde horren barruan, %16ak obesitatea. Kasu gehienetan obesitatea osasungarritasun gutxiko bizimoduari lotuta badago ere, zenbait hormona nahasmenduk eragina izan dezakete haren garapenean. Policlínica Gipuzokako espezialistak azaltzen duenez, “tiroidearekin, kortisolarekin edo insulinorresistentziarekin lotutako arazo horiek obesitatearekin lotutako gaixotasun hormonalen adibideak dira”. Edozein alterazio hormonal baztertzeko, endokrinologoak medikuarengana joatea eta hormona-azterketa osoa egitea gomendatzen du.

Alfredo Yoldik azaltzen duenez, hormonek pisua galtzeko prozesuan bigarren mailako zeregina duten arren, eragina izan dezakete gosea erregulatuz eta asetasuna sortuz, baina dietarekin eta ariketarekin alderatuta, bere eragina beti txikiagoa izango dela adierazten du. “Funtsezkoa bizimodu osasungarri bat mantentzea da”, nabarmentzen du espezialistak.

Genetika eta faktore aldaezinak

Zergatik dute pertsona batzuek argaltzeko erraztasun handiagoa, antzeko ohiturak izan arren? “Genetikak funtsezko eginkizuna du pisua galtzeko erraztasunean”, azaltzen du Yoldik. ‘Gene aurreztaileak’ deiturikoak daude, metabolismo basala murrizten dutenak eta pisua galtzea zailtzen dutenak. Heredatutako faktore horien ondorioz, antzeko bizimodua duten bi pertsonek oso emaitza desberdinak lor ditzakete argaltzen saiatzean.

Argaltzeko sendagaiak %30etik gorako gorputz-masaren indizea duten pertsonek erabiltzen dituzte, batez ere jateko antsietatea edo etengabeko gosea dutenek. Eskuragarri dauden aukeren artean, semaglutida (Ozempic) eta tirzepatida nabarmentzen dira, hasiera batean 2 motako diabetesa tratatzeko garatuak.

“Sendagai horiek apetituaren muinetan eragiten dute, gosea eta antsietatea gutxituz. Hala ere, dieta egokiarekin eta ariketa fisikoarekin konbinatzen badira bakarrik dira eraginkorrak”, ohartarazten du espezialistak. Gainera, mediku batek agindu behar ditu beti, zenbait kontrol egin behar baitira.

Iraunkortasuna eta osasuna, arrakastaren gakoak

Doktorearen ustez, pisua galtzeko prozesuetako akats nagusia iraunkortasun falta da. “Argaltzea prozesu kronikoa da, eta ohitura osasungarriak luzaroan mantentzea eskatzen du”, azpimarratzen du.

Helburu nagusia, estetikaz haratago, osasun orokorra hobetzea izan behar da. “Obesitatea hipertentsioa, diabetesa edo artikulazio-arazoak bezalako gaixotasunekin lotuta dago. Pisua galtzea osasuna irabaztea da”, ondorioztatzen du.