Prozedura berritzaile horrek garrantzia hartu du azken urteotan, eta nabarmen gutxitzen du fibrilazio aurikularrarekin (FA) lotutako konplikazioak izateko arriskua.

Bihotzaren ezkerreko orejuela ixtea tratamendu iraultzailea da fibrilazio aurikularra duten pazienteek koaguluen enbolismoa sufritzeko duten arriskua murrizteko, eta era berean, bizitza osorako antikoagulatzaileak (Sintrom) erabiltzea saihesteko. Prozedura berritzaile horrek garrantzia hartu du azken urteotan, eta arritmia horri lotutako konplikazioak izateko arriskua nabarmen txikiagotzen du, arritmia hori baita praktika klinikoan ohikoena.

“Orejuela bihotzaren ezkerreko aurikulan kokatutako egitura bat da, bere forma dela eta, ohikoa da odola urmaeltzea eta koaguluak sortzea. Koagulu horiek gorputzaren beste eremu batzuetara mugi daitezke, burmuinera adibidez, eta iktus bat eragin dezakete. Izan ere, ikerketa zientifikoek frogatu dute aurikulan sortutako koaguluen %80 orejuelan sortzen direla”, azaldu du Ramiro Trillo doktoreak, Policlínica Gipuzkoako Hemodinamika eta Kardiologia Interbentzionista Zerbitzuko buruak.

Fibrilazio aurikularra bihotz-arritmia ohikoena da praktika klinikoan, eta populazio orokorraren %1-2ri eragiten dio, gutxi gorabehera. Haien prebalentziak gora egiten du adinarekin, eta 80 urtetik gorakoen artean %9ra iristen da. Arritmia mota honetan, odola ezkerreko orejuelan geldi gera daiteke, eta horrek tronboak sortzen laguntzen du eta iktus bat izateko arriskua bost aldiz handitzen du. Hori saihesteko, pazienteek antikoagulatzaile bidezko tratamendua behar izaten dute. Tratamendu hori eraginkorra bada ere, odoljarioak jasateko arriskua dute eta kontrol zorrotza behar dute.

Orejuela ixteko, egitura hori blokeatu egiten da, odol-fluxutik isolatzeko berariaz diseinatutako metalezko tapoi txiki baten bidez. “Prozedura minimoki inbaditzailea da, kardiologia interbentzionistako gelan egiten duguna. Bena femoralaren bidez sartutako kateter bat erabiliko dugu, eta, ekografia transesofagikoz gidatuta, gailua zehaztasun handiz jarriko dugu. Ebakuntzak ordubete baino gutxiago irauten du, eta pazientea egun berean itzul daiteke etxera”, nabarmendu du Trillo doktoreak.

Orejuela ixteak aukera ematen digu tronboei eta enbolismoei eraginkortasunez aurrea hartzeko, arrisku-medikaziorik erabili behar izan gabe, horrela pazienteen bizi-kalitatea hobetuz

Tratamendu horrek aurikulan sortutako koaguluen %80a ezabatzeaz gain, aukera segurua eskaintzen du odoljarioak edo bestelako konplikazioak izateko arriskua dela-eta antikoagulatzaileak hartu ezin dituzten pazienteentzat. “Orejuela ixteak aukera ematen digu tronboei eta enbolismoei eraginkortasunez aurrea hartzeko, arrisku-medikaziorik erabili behar izan gabe, horrela pazienteen bizi-kalitatea hobetuz”, ondorioztatu du espezialistak.