• “Zeure burua zaindu behar duzula konturatzen bazara, lagundu egingo dizugu”. Kanpaina honen bidez, mezu nagusi hori igorriko zaie biztanleei. 3 Michelin izar dituen Pedro Subijana sukaldaria izango da kanpainako irudia.

Ekainaren 20an, asteazkena, Policlínica Gipuzkoako ateneoan elkartu dira gure erkidegoko bihotz-aditu onenak. Bertan, hain zuzen ere, Espainiako Bihotz Fundazioko presidenteak, Leandro Plaza kardiologo jaunak, prentsaurrekoan parte hartu du, “Bihotz Osasungarrirako Ohitura Egokien Dekalogoa” azaldu du eta kanpainako publizitate osoan izango du oihartzuna.

Berarekin batera, 3 Michelin izar dituen Pedro Subijana sukaldari ospetsua ere agertu zen. Kanpaina honetako irudia izango da, eta, horren bidez, ezustekorik ez edukitzeko prebenitu egin beharra dagoela eta aldian-aldian bihotz-hodietako azterketak egin behar direla azalduko die herritarrei.

Kanpaina honen bitartez, aldi berean era guztietako jarduketak jarriko dira abian, zenbait arlo eta taldetan. Horretarako, honako leku hauetan garatuko da lana: osasun-taldeak, gaixoen elkarteak, Donostiako Udala eta udaleko kultur etxeak. Hain zuzen ere, Eibarko kultur etxean eman da lehenengo hitzaldia.

Hiru jarduketa-ardatz

Kanpainan bertan, hiru jarduketa-ardatz garatuko dira. Publizitatean oinarritutako informazio-kanpainan, urteko azterketa egin behar dela eta Espainiako Bihotz Fundazioaren “Bihotz Osasungarrirako Dekalogoa” kontuan hartu behar dela adierazten da. Horrela, bada, bizi-ohitura egokiak ezarri ahal izango dira. Kanpaina honetako irudia Pedro Subijana da, eta, gainera, bihotz osasungarrirako menua ere erantsiko du bere karta ospetsuan. Kanpainaren zabalkundea handia izango da, tokian-tokian, nazio-mailan eta Europan egingo dela publizitatea.

Bigarrenik, Bihotz Osasungarrirako Osteratxoen Plana ere diseinatu da, biztanleen eta, batez ere, helduen sedentarismoari aurka egiteko. Osteratxoak asteazkenetan egingo dira 9:30ean, eta Donostiako Sorospen Etxetik irtengo dira. Fisioterapeutarekin batera joango dira, eta behar besteko jarraibideak emango dizkie parte-hartzaileei.

Hala ere, Sorospen Etxea 8:00etatik egongo da zabalik, parte-hartzaileek tentsioa hartzeko aukera izan dezaten eta aldian-aldian leku berean kontrolatu dezaten. 4 ibilbide lau erakargarri diseinatu dira, eta hiri osoa zeharkatuko dute. Beti-beti, Sorospen etxea izango da ibilbide guztietako helmuga.

Azkenik, Policlínica Gipuzkoak gaixoentzako urruneko jarraipen-kanpaina jarriko du abian, bihotz-kirurgiako ebakuntzaren ostean. Horretarako, informazio-programa berritzailea garatu da, ospitaleko altaren ondoren gaixoen urruneko jarraipena egin ahal izateko.

Inolako zalantzarik gabe, ardatz estrategikoenetakoa da, garapen-gaitasun handia duelako eta medikuntzako beste espezialitate batzuetan ere ezarri ahal izango delako. Programa berez egikaritzen den pen-drivean dago, eta, bertan agertzen den aplikazioaren bidez, gaixoak eskatutako datuen berri eman ahal izango du egunero. Aldi berean, unean bertan aztertuko dira Policlínicako Bihotz-hodietako Kirurgia Zerbitzuan. Programa hori probapean dago oraindik, eta oso irtenbide ona izan daiteke, ebakuntza osteko lehenengo egunetan gaixo horien bizi-kalitatea hobetzeko. Era berean, erreferentziako medikuek oso informazio ona izango dute, gaixoen tratamenduak eta jarraipenak hobetzeko egin beharreko azterketei eta ekintzei begira.

“Prebentzio kardiobaskularra eta detekzio goiztiarraren garrantzia” izango da Poliklinika eta Kutxaren Osasun Ikasgela 2010 ekintzaren zazpi hitzaldietako lehenengoan landuko duten gaia. Hitzaldi hau, Poliklinika Gipuzkoako Kardiologia Integraleko zerbitzuburua den Eduardo Alegría kardiologoak emango du, martxoaren 11ean arratsaldeko 19.30tan, Andia kaleko Kutxa aretoan, Donostian

“Bihotzekoen herena, osasuntsutzat jotako pertsonek jasaten dituzte”, hori da Poliklinikako Kardiologia Integraleko zerbitzuburua den Eduardo Alegria kardiologoak ziurtatzen duena. Berak emango du Poliklinikaren eta Kutxaren Osasun Ikasgela 2010-erako programatutako zazpi hitzaldietako lehenengoa. “Prebentzio kardiobaskularra eta diagnostiko goiztiarra” izenburua du, eta datorren ostegunean, martxoak 11, 19.30etan, izango da, Donostiako Andia kaleko Kutxa aretoan.

Alegria doktoreak 30 urtetik gorako esperientzia du kardiologia klinikoan, Nafarroako Klinika Unibertsitarioan, eta irakasle gisa ere badu esperientzia. Ziurtatzen du, orain arte, kardiologiak bihotzeko gaixotasunak dituzten pertsonak artatu dituela, biztanleria orokorraren % 7. Bere iritziz, baina, “funtsezkoa da, halaber, askoz ere ugariagoa den beste talde bati arreta eskaintzea: osasuntsutzat jotzen direnen taldea, baina bizimodu osasuntsua ez daramatenak edo kontuan hartzen ez dituzten (jakinda ala jakin gabe) arrisku faktoreak dituztenak. Sinestezina dirudien arren, -gehitzen du Eduardo Alegriak-, bihotzekoen herena, biztanleriaren talde honek jasaten ditu. Hori dela eta, horren inguruan hausnartu beharko genuke”.

Poliklinika Gipuzkoak, duela urtebete, Kardiologia Integralaren Zerbitzua jarri zuen abian. Zerbitzu honek duen desberdintasuna, hain zuzen, pazientearen jarraipen programa bat da, bizimoduak behin betiko aldatzea lortzeko. Eta hori, Eduardo Alegría kardiologoaren ustez, “ezinbestekoa da paziente horiek behar bezala sendatzeko”.

Hitzaldia, datorren martxoak 14an ospatuko den Arrisku Kardiobaskularra Prebenitzeko Europako Eguna dela eta antolatu da. Poliklinika Gipuzkoak, egun hori, herritarrei arrisku kardiobaskularraren faktoreen berri emanez ospatuko du, ondoko izenburupean: “2010: 2000 kaloria eta 10000 pauso zure osasun kardiobaskularraren alde”. Datorren igandean izango da, 10.00etatik 14.00etara, La Perlaren parean kokatutako karpan.

Adituak behin eta berriz dio arrisku kardiobaskularraren faktore garrantzitsuenak jokabide-faktoreak direla, hau da, aldatu daitezkeen bizitza ohiturekin lotutakoak, elikadura, ariketa fisikoa edo tabakismoa, esaterako. “Horiek kontrolatuz, -jakinarazi du kardiologoak-, % 90 murriztu daitezke arazo kardiobaskular larriak jasateko aukerak”. “Hori bai, horretarako, funtsezkoa da pertsona bakoitzaren diagnostikoa ezagutzea eta jarraipen egokia egitea”.

OSASUN IKASGELA 2010 EKINTZAREN HURRENGO HITZALDIAK

Apirilak 15 – “Jaio aurreko diagnostikoaren inguruko aurrerapenak” Hizlariak: Maria Eugenia Querejeta eta Juan Cruz Trecet doktoreak, Genetika Zelularra eta Ginekologia

Maiatzak 6 – “Kolon minbiziaren prebentzioa”. Hizlaria: Juan Arenas doktorea, Aparatu Digestiboko Zerbitzua

Ekainak 10 – “Zure begiak begiztatu. Laser Excimer begietako kirurgia” Hizlaria: Enrique Aramendia doktorea, Laser Excimer Unitatea.

Iraila – “Erronka berriak gizentasunaren kirurgian” (data zehazteke) Hizlaria: Juan José Martínez doktorea, Kirurgia Orokorra

Urria – “Prostata minbiziarentzako Da Vinci kirurgia robotikoa” (data zehazteke) Hizlariak: Madina eta Azparren doktoreak, Urologia

Azaroa – “Osteoporosia eta menopausia” (data zehazteke) Hizlaria: Alfredo Otálora, Ginekologia